ادیس ابابا (شِنہوا) ایتھوپیا کے ایک ماہر نے کہا ہے کہ برکس میکانزم میں ایتھوپیا کی شمولیت سے ملک کی اقتصادی ترقی میں نمایاں اضافہ ہونے اور باہمی فائدہ مند علاقائی تعلقات کو تقویت ملنے کی توقع ہے۔
ایتھوپیا کی سول سروس یونیورسٹی کے اسسٹنٹ پروفیسر مکرم مفتاح نے شِنہوا کو بتایا کہ یہ اقدام کئی وجوہات کی وجہ سے بنیادی ہے۔
اس سے ایتھوپیا کو برکس خاندان کے ساتھ مضبوط، پائیدار اقتصادی اور سیاسی تعاون قائم کرنے میں مدد ملے گی جس سے موجودہ اور نئے ارکان کے ساتھ بہتر اقتصادی، تجارتی اور سرمایہ کاری تعلقات میں سہولت میسر ہو گی۔
مفتاح نے اس بات پر زور دیا کہ برکس میں ایتھوپیا کی رکنیت مشرقی افریقی ملک کو ادارہ جاتی اور باہمی فائدہ مند انداز میں خارجہ تعلقات کو آگے بڑھانے کے قابل بنائے گی۔
انہوں نے کہا کہ ایتھوپیا نسبتاً غریب ملک ہونے کے باوجود ایک مضبوط اور مہذب ملک ہے جس کی آبادی بہت زیادہ ہے۔
یہ مشرقی افریقہ اور مجموعی طور پر افریقہ میں ایک سیاسی قائد کے طور پر کام کرتا ہےجس سے برکس کو براعظم افریقہ میں مغرب کے غلبے کا مقابلہ کرنے میں مدد ملتی ہے۔
انہوں نے کہا کہ برکس نے ایتھوپیا کو رکن کے طور پر تسلیم کرنے میں باہمی فائدے کو دیکھا ہوگا۔ اس اقدام سے ایتھوپیا کے چین اور روس جیسے ممالک کے ساتھ پہلے سے مضبوط اقتصادی تعلقات مزید مضبوط ہوں گے اور یہ تعلقات ادارہ جاتی، دیرپا اور اعتماد و قانونی شرائط پر مبنی ہوں گے۔
