افغانستان کے کچھ حصوں میں زلزلے کے باعث متعدد گھر تباہ اور کم از کم 14 افراد زخمی ہو گئے ہیں۔صوبائی محکمہ اطلاعات و ثقافت کے سربراہ بلال حذیفہ نے منگل کے روز بتایا کہ امریکی جیولوجیکل سروے کے مطابق زلزلہ گزشتہ روزمقامی وقت کے مطابق سہ پہر 4 بجکر 30 منٹ پر آیا جس کی شدت ریکٹر اسکیل پر 5.1 ریکارڈ کی گئی اور گزشتہ زلزلے سے متاثرہ اضلاع گیان اور برمل میں شدید جھٹکیمحسوس کیے گئے جس کے باعث 12 افراد زخمی ہوئے ہیں۔مقامی اہلکار کلیم گل نے شِنہوا کو بتایا کہ ہمسایہ صوبہ خوست کے ضلع سپیرا میں زلزلے کے باعث 2 افراد زخمی اور 18 مکان تباہ ہوئے ہیں۔مقامی افراد کے مطابق پیر تک ضلع گیان میں تقریبا 30 بار زلزلے کے جھٹکے محسوس کیے جا چکے ہیں۔

سرکاری خبر رساں ایجنسی باختر نے بھی گیان کے علاقے میں بار بار زلزلوں اور دھماکوں کی آوازیں سنائی دینے سے متعلق خبر دی ہے۔حکام نے بتایا کہ 22 جون کو مذکورہ اضلاع میں آنیوالے گزشتہ زلزلے میں کم از کم 1 ہزار افراد ہلاک اور1 ہزار 500 سے زائد زخمی ہو گئے تھے۔دریں اثنا کابل کے رہائشیوں کے مطابق پیر کو رات گئے کابل اور اس کے آس پاس کے علاقوں میں ایک اور زلزلے کے جھٹکے محسوس کیے گئے ہیں۔