سینئر گلوکار، نغمہ نگار و موسیقار حسن جہانگیر نے دعوی کیا ہے کہ بالی ووڈ کے سپر سٹار سلمان خان سمیت متعدد بالی ووڈ اداکاروں نے ان کے اسٹائل کو کاپی کیا۔حسن جہانگیر نے حال ہی میں ایف ایچ ایم پوڈکاسٹ میں شرکت کی۔ اس دوران ان کا کہنا تھا کہ انہوں نے کم عمری میں ہی نوٹ کیا کہ بولی وڈ میں گانا کوئی گاتا ہے، اسے لکھتا کوئی اور ہے، اس کی میوزک کوئی اور ترتیب دیتا ہے جب کہ کوریوگرافی دوسرا شخص کرتا ہے۔حسن جہانگیر نے بتایا کہ انہوں نے اسی وقت ہی سوچا کہ وہ تمام خود کریں گے' انہوں نے نئے ٹرینڈز اور انداز متعارف کرائے۔انہوں نے بات کو جاری رکھتے ہوئے بتایا کہ وہ پہلے گلوکار ہیں جنہوں نے اپنے میوزک کنسرٹ کے دوران شرٹ اتار پھینکی تھی اور بعد میں آنے والے اداکاروں نے انہیں کاپی کیا۔انہوں نے سوالیہ انداز میں کہا کہ سلمان خان کب اسٹار بنے تھے؟ سلمان خان کے اسٹار بننے سے قبل وہ 1979 میں بھارت میں آگ لگا چکے تھے، وہ نئے ٹرینڈز اور اسٹائل متعارف کرا رہے تھے۔ حسن جہانگیر نے دعوی کیا کہ سلمان خان سمیت بعد میں آنے والے اداکاروں نے ان کے اسٹائل کو کاپی کیا جب کہ انہوں نے خود ہالی ووڈ کے ماضی کے مقبول اداکاروں کو دیکھ کر اسٹائل اپنائے تھے۔

کریڈٹ : انڈیپنڈنٹ نیوز پاکستان-آئی این پی