شہنشاہ قوالی نصرت فتح علی خان کو میوزک اسٹریمنگ سروس نے اعزاز سے نواز دیا۔میوزک اسٹریمنگ سروس اسپاٹیفائی نے شہنشاہ قوالی نصرت فتح علی خان کو پاکستان کا پہلا اسپاٹیفائی آئیکون گلوکار منتخب کرلیا۔ کراچی میں ہائوس آف آئیکون کے عنوان سے منعقدہ تقریب میں اسپاٹیفائی آئیکون پاکستان سیریز کا آغاز کیا گیا۔ تقریب میں گلوکاروں اور انکے ان گیتوں پر روشنی ڈالی گئی جنہوں نے 1950 کی دہائی سے پاکستان کے موسیقی کے منظر نامے کو ایک نئی شکل دینے میں لازوال کردار ادا کیا۔تقریب میں معروف اداکاروں، میڈیا کی اہم شخصیات، گلوکاروں اور سوشل میڈیا انفلوئنسرز نے شرکت کی۔ ان شخصیات میں عاصم اظہر، ینگ اسٹنرز، جنید خان، وائٹل سائنز کے سابق موسیقار شہزاد شاہی حسن، موسیقار ارشد محمود، بلال سعید اور اسپاٹیفائی کے ریڈار آرٹسٹ عمیر بھی شامل ہیں۔ میوزک اسٹریمنگ پلیٹ فارم کے پاکستان، بنگلہ دیش اور سری لنکا کیلیے سینئر آرٹسٹ اینڈ لیبل پارٹنرشپ منیجر خان ایف ایم نے بتایا کہ 2021 میں اسپاٹیفائی کی پاکستان میں آمد کے بعد سے اب تک نصرت فتح علی خان کو 9 لاکھ سے زائد بار سرچ کیا جا چکا ہے۔ سال 2024 میں اسی پلیٹ فارم پر ان کے سب سے زیادہ سنے جانے والے گانوں میں ''میرے رشک قمر''، ''سوچتا ہوں '' اور ''یہ جو ہلکا ہلکا سرور ہے'' شامل ہیں۔

کریڈٹ: انڈیپنڈنٹ نیوز پاکستان-آئی این پی