ابھرتے ہوئے اداکار علی رضا نے انکشاف کیا ہے کہ انہیں پاکستانی ہونے کی بنا پر بالی ووڈ فلم میں کاسٹ نہیں کیا گیا تھا۔علی رضا نے حال ہی میں ایک یوٹیوب انٹرویو میں انکشاف کیا کہ انہیں بھارت کے معروف فلم پروڈکشن ہائوس یش راج فلمز کی ٹیم نے کام کی پیش کش کی۔انہوں نے بتایا کہ بھارتی پروڈکشن کمپنی کی ٹیم نے ان سے پہلے سوشل میڈیا کے ذریعے رابطہ کیا' بات چیت کے دوران انہیں بھارتی فلم اے دل ہے مشکل میں رنبیر کپور کے ایک سین کا کلپ بھیجا گیا اور ان سے وہی سین اپنے انداز میں شوٹ کرکے بھیجنے کا کہا گیا۔انہوں نے بتایا کہ جب انہوں نے منظر شوٹ کرکے بھیجا تو انہیں منتخب کرلیا گیا اور ان سے باقی معاملات بھی طے پا گئے۔ان کے مطابق معاملات طے پاجانے کے بعد پروڈکشن ہائوس نے ان سے پوچھا کہ وہ ان کے لیے کولکتہ سے کہاں کا ٹکٹ بھجوائیں، جس پر انہوں نے لاہور کا نام لیا۔علی رضا کے مطابق ان کے پاکستانی ہونے کے انکشاف کے بعد انہیں کاسٹ نہیں کیا گیا اور انہیں بھی بھارتی فلم میں کام نہ کرنے پر افسوس ہوا۔انہوں نے امید کا اظہار کیا کہ مستقبل میں کبھی انہیں بھارت سے کام کی پیش کش ہوگی اور وہ بالی ووڈ میں جاکر جوہر دکھائیں گے۔

کریڈٹ: انڈیپنڈنٹ نیوز پاکستان-آئی این پی