بالی ووڈ کے مشہور فلم ساز ساجد خان نے انکشاف کیا ہے کہ وہ خود پر لگائے گئے جنسی ہراسانی کے الزامات کے بعد انتہائی قدم اٹھانے والے تھے۔ساجد خان نے بالی ووڈ کی کئی مشہور فلمیں بنائی ہیں، 2018 میں فلم ساز پر ہاس فل 4 کی شوٹنگ کے دوران جنسی ہراسانی کے الزامات سامنے آئے تھے جن کے بعد ساجد کی زندگی میں ایک طوفان برپا ہوگیا تھا۔ ساجد خان کو میڈیا، عوام اور فلم انڈسٹری کی جانب سے بھی سخت تنقید کا سامنا کرنا پڑا۔اتنے سال خاموش رہنے کے بعد بالآخر ساجد خان نے اپنی زندگی کے اس مشکل دور کے بارے میں بات کی ہے۔ساجد خان نے انکشاف کیا کہ جنسی ہراسانی کے ان الزامات کے بعد انھوں نے کئی کئی بار خودکشی کے بارے میں سوچا۔ یہ وقت بہت مشکل تھا، میں کام سے محروم ہوگیا اور آمدنی نہ ہونے کے باعث مجھے اپنا گھر بیچنا پڑا اور کرائے کے مکان میں منتقل ہونا پڑا۔ساجد خان نے کہا کہ میں نے خود کو سمجھایا کہ یہ میری زندگی کی کتاب نہیں، صرف ایک باب ہے۔ میں نے اپنی بہن فرح اور اپنی ماں کیلئے خودکشی کا ارادہ ترک کیا تھا۔ میری ماں کا انتقال 2024 میں ہوا، وہ میری سب سے بڑی سپورٹ تھیں۔ آج وہ ہوتیں تو مجھے دوبارہ کھڑا ہونے کی کوشش کرتے دیکھ کر خوش ہوتیں۔

کریڈٹ : انڈیپنڈنٹ نیوز پاکستان-آئی این پی