معروف بھارتی گلوکار سونو نگم کے کانسرٹ کے دوران نشے میں دھت شخص ان پر کودپڑا تاہم گلوکار نے اپنی پرفارمنس جاری رکھی۔واقعے کی ویڈیو سوشل میڈیا پر خوب وائرل ہورہی ہے جس میں دیکھا جاسکتا ہے کہ نشے میں دھت شخص اچانک اسٹیج پر چڑھا اور لڑھکتے ہوئے سونو نگم کی جانب بڑھا۔تاہم سونو نگم بروقت چوکنا ہوچکے تھے اور انہوں نے فورا ایک طرف ہوکر خود کو اس شخص سے ٹکرانے سے بچا لیا جسے بعدازاں سیکیورٹی گارڈز نے دبوچ لیا اور تھپڑوں کی برسات کرتے ہوئے اسٹیج سے اتار دیا۔ اس اچانک حملے کے باوجود سونو نگم نے ایک لمحے کیلئے بھی گانا نہیں روکا اور کہیں بھی ان کے سر ہلتے ہوئے محسوس نہیں ہوئے، اِس تمام صورتحال کے دوران سونو نگم نے مسلسل گانا گانا جاری رکھا۔وائرل ویڈیو پر سوشل میڈیا صارفین نے کمنٹ کرتے ہوئے گلوکار کی کمال مہارت پر انہیں خوب سراہا اور انہیں حقیقی لیجنڈقرار دیا۔

کریڈٹ: انڈیپنڈنٹ نیوز پاکستان-آئی این پی