بھارتی پنجاب کے معروف گلوکار و اداکاردلجیت دوسانجھ نے کنسرٹ میں موبائل مارنے والے مداح کو اپنی جیکٹ تحفے میں دیدی۔ دلجیت دوسانجھ آج کل اپنے دلومیناتی ٹور کے سلسلے میں پیرس میں موجود ہیں اور کامیاب کنسرٹ کر رہے ہیں۔حال ہی میں اداکار دلجیت دوسانجھ نے پیرس میں منعقدہ ایک کنسرٹ میں پرفارم کیا جس کی ایک ویڈیو سوشل میڈیا پر وائرل ہوئی جس میں دیکھا جا سکتا ہے کہ دلجیت دوسانجھ اپنی پرفارمنس میں مصروف ہیں کہ اسی دوران شائقین میں سے ایک مداح نے گلوکار پر اپنا موبائل فون پھینک دیا۔بعد ازاں دلجیت دوسانجھ نے مداح پر غصہ کرنے کے بجائے محبت بھرے انداز میں کہا کہ اپنا فون محفوظ رکھیں، میں آپ سے پیار کرتا ہوں لیکن آپ کی یہ حرکت اچھی نہیں لگی، آپ وعدہ کریں کہ آپ دوبارہ کبھی بھی ایسا نہیں کریں گے۔ویڈیو میں دیکھا جا سکتا ہے کہ گلوکار مداح کو اپنی جیکٹ دیتے ہوئے کہہ رہے ہیں کہ کبھی بھی کسی فنکار کے ساتھ دوبارہ ایسی حرکت نہ کرنا، یہ اچھی بات نہیں ہے۔

کریڈٹ: انڈیپنڈنٹ نیوز پاکستان-آئی این پی