سیکیورٹیز اینڈ ایکسچینج کمیشن آف پاکستان نے پاکستان اسٹاک ایکسچینج کے ذریعے سکوک کی نیلامی کی سہولت فراہم کرکے حکومتی قرضوں کی منڈی کو تبدیل کرنے میں اہم کردار ادا کیا ہے۔ ماہرین نے اس اقدام کو مارکیٹ کی شفافیت، سرمایہ کاروں کے اعتماد میں اضافے اور مالیاتی شعبے میں شراکت کو بڑھانے کے لیے گیم چینجر قرار دیا ہے۔ دسمبر 2023 سے ایس ای سی پی نے 18 نیلامیوں کے انعقاد میں حکومت کی مدد کی ہے جس سے اجارہ سکوک کے ذریعے 2.25 ٹریلین روپے اکٹھے کیے گئے ہیں۔ مارکیٹ کے شرکا، بشمول بینک، میوچل فنڈز، اور بروکرزنے اوور دی کاونٹر ٹریڈنگ سسٹم سے ایکسچینج پر مبنی میکانزم کی طرف جانے کا وسیع پیمانے پر خیرمقدم کیا ہے۔ مالیاتی ماہرین کا خیال ہے کہ یہ منتقلی قیمتوں کو نمایاں طور پر بہتر بنائے گی، منصفانہ مسابقت کو یقینی بنائے گی اور مارکیٹ کو مزید قابل رسائی بنائے گی۔ مالیاتی ماہر اور ایس بی پی کے سابق اہلکارڈاکٹر احسن رضانے روشنی ڈالی کہ ایس ای سی پی کا اقدام پاکستان میں مالیاتی مارکیٹ کی ترقی کی جانب ایک اہم قدم ہے۔ انہوں نے کہا کہ روایتی قرض بازار میں شفافیت کا فقدان ہے۔ پاکستان اسٹاک ایکسچینج کے توسط سے سکوک نیلامی کے تعارف نے اصل وقت کی قیمتوں کی دریافت اور سرمایہ کاروں کے لیے وسیع تر رسائی کو یقینی بنا کر ان مسائل کو حل کیا ہے۔

انہوں نے اس بات پر زور دیا کہ یہ تبدیلی مارکیٹ کی لیکویڈیٹی کو بڑھانے کے ساتھ ساتھ ادارہ جاتی اور خوردہ سرمایہ کاروں کو راغب کرے گی، بالآخر چند بڑے کھلاڑیوں پر انحصار کم کرے گا جو پہلے قرض کی منڈی پر حاوی تھے۔ ایس ای سی پی کے سابق شریعہ مشیر ڈاکٹر سید ایم عبدالرحمن نے قرض کی منڈی کو مزید موثر اور مسابقتی بنانے میں کمیشن کی کوششوں کی تعریف کی۔ انہوں نے نشاندہی کی کہ ماضی میں ایک شفاف تجارتی طریقہ کار کی کمی سرمایہ کاروں میں غیر موثریت اور غیر یقینی صورتحال کا باعث بنی۔ سرکاری سکوک ٹریڈنگ کو الیکٹرانک پلیٹ فارم پر لا کرسیکیورٹیز اینڈ ایکسچینج کمیشن نے بولیوں میں رازداری کو یقینی بنایا ہے، نگرانی کو بہتر بنایا ہے اور قیمتوں کے بہتر تعین کو ممکن بنایا ہے۔ انہوں نے مزید وضاحت کی کہ اس اقدام سے ٹیکس وصولی، حکومتی قرضے لینے کے اخراجات اور سرمایہ کاروں کے مجموعی جذبات پر مثبت اثر پڑے گا۔رحمان کا خیال ہے کہ مزید اضافہ، جیسے کہ غیر ملکی شرکت کی اجازت دینا اور ڈیجیٹل پلیٹ فارمز کو مربوط کرنا، پاکستان کی سکوک مارکیٹ کو بین الاقوامی معیار تک پہنچا سکتا ہے۔ ایس ای سی پی ایک مسابقتی اور شفاف مالیاتی ماحول کو فروغ دینے کے لیے پرعزم ہے، اس بات کو یقینی بنانے کے لیے کہ حکومت اور سرمایہ کار دونوں ایک موثر قرضہ منڈی سے مستفید ہوں۔ ماہرین کا خیال ہے کہ اگر یہ اصلاحات جاری رہیں تو پاکستان کی سکوک مارکیٹ اسلامی مالیات میں نئے معیارات قائم کر سکتی ہے اور دیگر ابھرتی ہوئی معیشتوں کے لیے ایک ماڈل کے طور پر کام کر سکتی ہے۔

کریڈٹ: انڈیپنڈنٹ نیوز پاکستان-آئی این پی ویلتھ پاک