پاکستان سپر لیگ(پی ایس ایل) کے 10ویں ایڈیشن کے آغاز سے قبل پشاور زلمی اور کوئٹہ گلیڈی ایٹرز کے درمیان ہونیوالا نمائشی میچ خطرے میں پڑگیا۔ میڈیا رپورٹس کے مطابق پی ایس ایل کے آغاز سے قبل 8 اپریل کو ہونیوالا پشاور زلمی اور کوئٹہ گلیڈی ایٹرز کے درمیان نمائشی میچ خراب آٹ فیلڈ کے باعث ممکن نہیں۔ پاکستان کرکٹ بورڈ (پی سی بی) کی ٹیم نے پشاور کے ارباب نیاز اسٹیڈیم کا دورہ کیا اور گرائونڈ کی حالت کو دیکھ کر اسے نمائشی میچ کی میزبانی کیلئے نامناسب قرار دیا۔ رپورٹ میں کہا گیا ہے کہ پچ اور آئوٹ فیلڈ صحیح نہیں، ڈریسنگ رومز میں ضروری بنیادی سہولیات بھی نہ ہونے کے برابر ہیں، اسی طرح میڈیا باکس اور کمنٹری کیلئے بھی مناسب سہولیات نہیں ہیں۔ دوسری جانب پشاور زلمی کے اونر جاوید آفریدی نے پی ایس ایل 10ویں ایڈیشن کے میچز پشاور میں کروانے کیلئے چیئرمین پی سی بی محسن نقوی سے رابطہ بھی کیا تھا۔ واضح رہے کہ پی ایس ایل کا 10واں ایڈیشن 11 اپریل سے شروع ہوگا، جہاں افتتاحی میچ میں چیمپئن اسلام آباد یونائیٹڈ اور لاہور قلندرز کی ٹیمیں مدمقابل آئیں گی۔

کریڈٹ: انڈیپنڈنٹ نیوز پاکستان-آئی این پی