کراچی کے علاقے گلشن اقبال میں گاڑی کی ٹکر سے ایک شخص جاں بحق اور دوسرا زخمی ہوگیا، حادثے کے بعد موقع پر موجود افراد نے گاڑی کو آگ لگا دی۔تفصیل کے مطابق گلشن اقبال میں تیز رفتار گاڑی مسکن چورنگی کی جانب جاتے ہوئے گرین بیلٹ توڑتی ہوئی مخالف سمت میں چلی گئی جس سے 2 راہ گیر شدید زخمی ہوگئے ۔ پولیس حکام کے مطابق ایک شخص جاں بحق ہوگیا جبکہ دوسرے کی حالت تشویشناک ہے ۔ حادثے کے بعد موقع پر موجود افراد مشتعل ہوگئے اور انہوں نے گاڑی میں توڑ پھوڑ کرنے کے بعد آگ لگادی۔ پولیس حکام نے مزید بتایا کہ مختلف فوٹیجز کی مدد سے گاڑی کو آگ لگانے والے متعدد افراد کو بھی حراست میں لیا ہے جن سے تفتیش کا عمل جاری ہے ۔ حادثے میں مرنے والے کی فوری طور شناخت نہیں ہوسکی ۔دوسری جانب کراچی میں لیاری ایکسپریس وے پر سیمنٹ مکسر ٹرک نے تین گاڑیوں کو ٹکر ماردی جس سے گاڑیوں کو نقصان پہنچا جب کہ خوش قسمتی سے کوئی جانی نقصان نہیں ہوا۔مسافروں کا کہنا ہے کہ لیاری ایکسپریس وے پر پابندی کے باوجودہیوی ٹریفک چل رہی ہے۔واضح رہے کہ لیاری ایکسپریس وے چھوڑی گاڑیوں کیلئے مختص ہے اور اس ایکسپریس وے پر ہیوی ٹریفک چلانے پر پابندی ہے۔

کریڈٹ: انڈیپنڈنٹ نیوز پاکستان-آئی این پی